Cijene garaža u Beogradu lete u nebo: do 35.000 eura za jedno mjesto

Tokom 2025. godine cijene garažnih mjesta u Beogradu dostigle su rekorde i na pojedinim lokacijama kvadrat se prodaje i po 4.000 eura, što ih čini skupljima od mnogih kuća u okolnim mjestima. U centru grada, garažna mjesta se kreću između 30.000 i 35.000 eura, a u luksuznim kompleksima i novogradnjama cijene znaju biti i znatno više.

Primjeri sa tržišta pokazuju da garaža u novogradnji na Bežanijskoj kosi, površine oko 12 kvadrata, košta oko 16.000 eura. U Mirijevu, prostor od 24 kvadrata prodaje se za približno 15.000 eura, dok se na Bulbuderu za garažu slične veličine traži oko 16.500 eura. Na Vračaru i u blizini Cvetkove pijace cijene se kreću od 18.000 do čak 39.000 eura, u zavisnosti od lokacije i kvaliteta objekta. U Novom Beogradu, u Bloku 63, garaža od 14 kvadrata može dostići između 27.000 i 34.500 eura, dok se u Beogradu na vodi garažno mjesto od 12 do 13 kvadrata prodaje u prosjeku za oko 30.000 eura.

Sve ovo pokazuje da je posjedovanje garažnog mjesta u Beogradu postalo prava privilegija. Potražnja ne jenjava, posebno u centralnim i novim gradskim zonama, a cijene nastavljaju da rastu. Za mnoge građane, kupovina garaže danas je investicija jednaka kupovini manjeg stana.